पाकानोनलाई स्वर्ण

पाकानोनलाई स्वर्ण

  • , 1.1K जनाले हेर्नुभयो
  • 1.1K
    SHARES

  • पाकानोनलाई स्वर्ण

    काठमाडौं : थाइल्यान्डका पाकानोन चानथाराङ्सीले ‘काठमाडौं अन्तर्राष्ट्रिय भर्चुअल तेक्वान्दो पुम्से च्याम्पियनसिप’मा स्वर्ण जितेका छन्। शनिबारबाट सुरु भएको च्याम्पियनसिपको छात्र १२ वर्षमुनिको स्पर्धामा पाकानोनले स्वर्ण जितेका हुन्। उनले भारतका देवासिस दासलाई पछि पारे।

    यस स्पर्धामा मलेसियाका बालाजी तेक्वान्दो स्कुल र मकाउका वाई हाङ चानले कांस्यमा चित्त बुझाए।यसैगरी छात्र १० वर्षमुनिको समूहमा मलेसियाका मोहमद अरिफिन अस्नावीले पहिलो स्थान हात पारे। यस समूहमा अरिक रानाले रजत जित्दा श्रीलंकाका पुमिदु देनुका पाथिराना र नेपालका सुवान गुरुङले कांस्य पदक पक्का गरे। छात्राको १० वर्षमुनिको स्पर्धामा श्रीलंकाकी थिनुमी भिसास्नाले स्वर्ण पदक जितिन्। उनले मलेसियाकी नुर अयर अब्दुल्लालाई पछि पारिन्। नेपालकी प्रतीक्षा राना र मलेसियाकी सोभिना मेइ सासौले कांस्य पदक जिते।यसैगरी छात्रा १२ वर्षमुनिको समूहमा मलेसियाकी जोसेफिन चिन जियाले स्वर्ण जितिन्। उनले मेक्सिकोकी क्लाइरे फ्लोरेस चापालाई पछि पारिन्। मलेसियाकी इरिस नुर युसुफ र थाइल्यान्डकी रावी मोनानीले तेस्रो स्थानमा चित्त बुझाए।

    दुईदिने च्याम्पियनसिप नेपाल ओलम्पिक कमिटीका अध्यक्ष जीवनराम श्रेष्ठले उद्घाटन गरे। उनले अहिलेको विषम् परिस्थितिमा पनि खेलकुदलाई चलायमान बनाउन च्याम्पियनसिपले महत्वपूर्ण भूमिका खेल्ने बताए।कार्यक्रममा नेपाल तेक्वान्दो संघका उपाध्यक्ष हरिश्वर पोखरेल, राष्ट्रिय खेलकुद परिषद् (राखेप) की सदस्य नन्दा बस्याल, च्याम्पियनसिपका संयोजक कुमार लामा घिसिङलगायतको उपस्थिति थियो। कार्यक्रममा राखेप बोर्ड सदस्यमा नियुक्त भएकी बस्याललाई सम्मान गरियो। च्याम्पियनसिपमा नेपालसहित १९ राष्ट्रका तीन सय ६२ खेलाडीले प्रतिस्पर्धा गर्दै छन्। च्याम्पियनसिपमा नेपालका एक सय ९० र हङकङ, मलेसिया,

    श्रीलंका, भारत, म्यानमार, मकाउ, सुरिनेम, थाइल्यान्ड, मेक्सिको, अस्ट्रेलिया, जापान, नाइजेरिया, बंगलादेश, टिमोर, बेलायत दक्षिण कोरिया, फिलिपिन्स र कम्बोडियाका एक सय ७१ खेलाडीले सहभागिता जनाएका छन्। युनाइटेड तेक्वान्दो डोजाङ, सीतापाइला तेक्वान्दो डोजाङ, सगरमाथा न्यु बानेश्वर तेक्वान्दो डोजाङ र पिङ्ला तेक्वान्दो डोजाङको संयुक्त पहलमा च्याम्पियनसिप आयोजना हुन लागेको हो। च्याम्पियनसिपमा यू–१०, यू–१२, यू–१४, यू–१७, यू–२१, यू–२९, यू–४०, यू–५० र ५० वर्षभन्दा माथिका उमेर समूहमा प्रतिस्पर्धा हुनेछ। महिला तथा पुरुषका लागि एउटै उमेर समूह निर्धारण गरिएको छ। हरेक उमेर समूहका लागि पुम्सेका छुट्टाछुट्टै विधा तोकिएको छ।

    च्याम्पियनसिपका उत्कृष्ट महिला तथा पुरुष खेलाडीले एक सय अमेरिकी डलर पुरस्कार प्राप्त गर्नेछन्। युट्युबमा सबैभन्दा बढी भ्यु प्राप्त भिडियोले मोस्ट लाइक भिडियोका रूपमा दुई सय अमेरिकी डलर पुरस्कार प्राप्त गर्नेछ।

    सम्बन्धित खवर